ADVERTISEMENT
ADVERTISEMENT

MCHANGANYIKO

WIZARA YA AFYA, MAENDELEO YA JAMII, JINSIA, WAZEE NA WATOTO YATOA TAARIFA KUHUSU SIKU YA KIMATAIFA YA MTOTO WA KIKE KITAIFA

By

on

Mkurugenzi wa Idara ya Maendeleo ya Watoto Bi Magreth Mussai akizungumza na waandishi wa habari  Mjini Dodoma kuhusu Maadhimisho ya Siku ya kimataifa ya Mtoto wa Kike yatakayofanyika kitaifa Wilayani Tarime Mkaoni Mara Oktoba 11 mwaka 2017 kulia ni Kaimu Mkurugenzi wa Manunuzi Bi. Martha Chuma na wa pili kulia ni Mkurugenzi wa Maendeleo ya Jamii Bw. Patrick Golwike.

Pix 2

Baadhi ya watendaji wa  Wizara ya Afya,Maendeleo ya Jamii, Jinsia Wazee na Watoto wakifuatilia mkutano kati ya Waandishi wa Habari na Mkurugenzi wa Idara ya Maendeleo ya Watoto Bi Magreth Mussai(hayupo pichani) wakati akitoa taarifa kuhusu Maadhimisho ya Siku ya Kimataifa ya Mtoto wa Kike yatakayofanyika kitaifa Wilayani Tarime Mkaoni Mara Oktoba 11 mwaka 2017.

Picha Na Kitengo cha Mawasiliano WAMJW

………………

TAARIFA KUHUSU MAADHIMISHO YA SIKU YA KIMATAIFA YA MTOTO WA KIKE ITAKAYOFANYIKA TAREHE 11 OKTOBA, 2017 KATIKA WILAYA YA TARIME, MKAONI MARA

 

Ndugu Wanahabari,

Awali ya yote, napenda kumshukuru Mwenyezi Mungu, kwa kutujalia afya njema na kutuwezesha sote kukutana mahali hapa. Pili, napenda kuwashukuru waandishi wa habari wote mliohudhuria kikao hiki, kwani kupitia kwenu Serikali itapata fursa ya kupeleka ujumbe maalum kwa wazazi, walezi na Watanzania wote kuhusu Maadhimisho ya Siku ya Kimataifa ya Mtoto wa Kike kwa mwaka 2017.

Tarehe 11 Oktoba ya kila mwaka Tanzania inaungana na Nchi nyingine wanachama wa Umoja wa Afrika kuadhimisha Siku ya Kimataifa ya Mtoto wa Kike.  Kwa mwaka huu, Maadhimisho hayo yatafanyika wilaya ya Tarime mkoani Mara. Mkoa wa Mara ni miongoni mwa mikoa 5 inaoongoza kwa mimba za utotoni ambayo ni Katavi (45%), Tabora (43%), Dodoma (39%), Mara (37%) na Shinyanga (34%).

 

Ndugu Wanahabari,

Katika kufanikisha maadhimisho ya mwaka, wizara kwa kushirikiana na wadau wa maendeleo imepanga kufanya shughuli mbalimbali ikiwemo kutoa elimu ya kujitambua  na  afya ya uzazi ili watoto wa kike waweze  kujilinda na mimba za utotoni. Aidha, uhamasishaji utafanyika kwa lengo la kujenga uelewa kwa waendesha Bodaboda kuhusu madhara ya mimba za utotoni na kujali utu wa mtoto wa kike. Vilevile kutafanyika  Kongamano la watoto ambalo litawapa watoto nafasi kujadili changamoto zinazowakabili ikiwemo masuala ya ukatili. Sambamba na hili kutakuwa  na Kongamano la Wazazi, walezi, viongozi wa dini na watu mashuhuri watakaojadili changamoto za malezi kwa mtoto.

 

Ndugu Wanahabari,

Kaulimbiu ya mwaka huu ni ‘’Tokomeza Mimba za Utotoni; Tufikie Uchumi wa Viwanda’’ Kaulimbiu hii inasisitiza kupiga vita kwa nguvu zote mila na desturi zenye athari kwa watoto zenye kupelekea mimba za utotoni na kuathiri maendeleo ya mtoto wa kike na kurudisha nyuma maendeleo ya nchi. Kuna usemi kuwa kumwendeleza mtoto wa kike ni kuendeleza familia na taifa kwa kuwa mchango wa mwanamke katika uchumi wa nchi ni mkubwa kwa kuzingatia idadi ya wanawake ukilinganisha na wanaume hapa nchini. Kundi hili lina mchango mkubwa katika ujenzi na maendeleo ya viwanda nchini. Hivyo tabia na mienendo yote yenye viashiria vya kusababisha mimba kwa watoto wa kike ni lazima vidhibitiwe. Hii itasaidia kuwa na watoto watakaowezesha taifa kufikia malengo ya maendeleo endelevu ifikapo mwaka 2030.

 

Ndugu Wanahabari,

Taarifa ya Shirika la Afya Duniani (WHO) ya mwaka 2014 inaonyesha kuwa asilimia 11 ya wanawake waliojifungua walikuwa na umri kati ya miaka 15 -19.

Utafiti wa Afya ya Uzazi na Utoto na Viashiria vya Malaria (TDHS) wa mwaka 2015 unaonyesha kuwa asilimia 27% ya watoto wa kike wanapata mimba wakiwa na umri chini ya miaka 18. Aidha, taarifa ya utafiti ya hali ya ukatili dhidi ya watoto iliyotolewa  mwaka 2011 unaonyesha kuwa kwa  kila watoto wa kike 3 mtoto 1 (27.9%) amefanyiwa vitendo vya ukatili na takribani asilimia 6.9 walilazimishwa kufanyiwa ukatili wa kingono.

Ndugu Wanahabari,

Katika kukabiliana na changamoto mbalimbali zinazowakabili watoto wa kike  Serikali kwa kushirikiana na wadau imeanza kutekeleza  Mpango Kazi wa Taifa wa Kutokomeza Ukatili dhidi ya Wanawake na Watoto (2017/18 -2021/22).  Mpango huu umelenga kupunguza ukatili dhidi ya watoto kwa asilimia 50 ifikapo mwaka 2021/22 na tunatarajia kupunguza mimba za utotoni kutoka asilimia 27 hadi kufikia asilimia 5.

Mwisho

Ndugu Wanahabari,

Ni matarajio yangu kuwa wanahabari mtaendelea kuhamasisha umma kuhusu kaulimbiu na kuhamasisha wananchi kujitokeza katika Maadhimisho ya siku hii ili kuimarisha utoaji haki sawa kwa watoto wote ikiwa ni pamoja na kutokomeza mimba za utotoni kwa watoto wa kike walioko masomoni ili kutimiza ndoto zao.

Nawashukuru sana kwa kukubali mwaliko wa wizara kuja kuwa nasi kwa siku ya leo.

Asanteni kwa kunisikiliza

Facebook Comments

You must be logged in to post a comment Login

Close